【疫情】新冠疫情又返黎啦！今次「飛行模式」你個肺會慢慢出現「毛玻璃」?

各位好！最近真係有件幾重要嘅事想同大家講吓，大家真係要留心，就係個新冠疫情呀，睇嚟真係「又」返嚟啦！ 最近特別係四月開始，有個好明顯嘅回溫跡象，你睇返政府份報告，從十月到三月個數字都算平穩，但一到四月就急速上升，個圖幾乎係四十五度向上升！真係唔可以掉以輕心。

點解今次要咁小心呢？因為呢個病毒呀，家陣變到好容易傳染，而且佢家陣玩緊「潛行模式」，你中咗招呀，可能初頭係唔知㗎。以前嗰種COVID一中就好快知自己病，但今次症狀會慢慢慢慢咁樣發出嚟。

仲有個好恐怖嘅地方，就係有醫生話，今次好似以前講嘅「肺花咗」，照電腦掃描會見到「毛玻璃」，即係肺部睇落去朦朦地、花咗咁。以前COVID初出嗰陣，一中好快就肺花。但今次呢個「毛玻璃」症狀會慢慢出現，所以好驚，因為當你發現到嘅時候，個情況可能已經好嚴重。呢個2025年嘅新版本，真係改晒性格，玩潛行，仲要更加容易人傳人添。

症狀方面呢，今次有機會好似普通感冒咁，搞到有人以為只係輕微唔舒服。不過有啲暗號大家要留意，包括全身乏力、頭痛，仲有以前中過都試過嘅，就係「失味」或「失嗅」。如果你發現聞唔到嘢或者食嘢冇味，真係要Check吓。

仲有啲症狀，譬如同刀片割喉嚨咁痛，吞口水都痛！有時舌頭會變色，喉嚨痕癢或者突然失聲。最重要係大家要記住，唔發燒唔等於冇感染！小症狀要觀察，大症狀就真係要快啲去做檢測或者睇醫生。

所以呢，預防真係好緊要。大家一定要提高警覺，多啲消毒，最緊要係戴返口罩啦！尤其係返工搭地鐵嗰啲，千祈唔好掉以輕心。見到個數字又升返，大家真係要醒目啲，早啲準備定口罩。

好多人都關心打唔打疫苗好。講真，打過疫苗或者中過招都仲有機會再中。打疫苗唔係話你唔會中，只不過中咗可能嚴重程度會減低。而且一支針嘅效力係有限嘅，唔係永久保護你。我自己個人嚟講，就未必想打住，除非好似以前咁強制先冇辦法。因為我始終都驚有啲長期副作用，畢竟之前臨床測試時間唔係好耐，冇人知長遠會點。不過如果你係高危人士，例如老人家或者小朋友，真係要問吓醫生意見，因為佢哋中咗可能會好大鑊，打針可能可以減輕併發症。但呢個係我個人睇法，我唔係俾意見大家打唔打，呢個大家要自己決定或者問專業人士。

如果不幸真係中咗招，個喉嚨痛真係好辛苦。除咗睇醫生之外，都有啲舒緩方法可以試。有人建議用鹽水漱口（我自己未試過），用加濕器令喉嚨唔好咁乾燥（記得加濕器嘅水要乾淨），飲多啲水，食物加啲黃薑粉（我覺得薑對咳同喉嚨唔舒服幾好），或者花草茶（呢個唔知邊度搵）。我個人覺得最有用嘅方法就係飲蜜糖水！蜜糖黐住喉嚨可以即時舒緩。當然唔係成樽食啦，開少少熱水慢慢飲會舒服好多！

另外都要小心飲食，煎炸、辣嘅嘢就唔好食住啦。仲有樣嘢大家可能忽略咗，就係要換牙刷，因為牙刷可能有細菌。瞓覺嘅時候可以抬高頭部。

總之呢，今次真係唔係講笑，個疫情又嚟勢洶洶咁。大家真係要記住提高警覺，做足預防措施，特別係戴返口罩。如果有懷疑，一定要做檢測，同埋如果中咗，都要去睇醫生。希望大家都可以健健康康！

以covid都係既，有d人中左都唔知，之後成家感染曬

世界末日呀

驚閪 家中兩老最近已經kamkamkam

信政府唔怕