[考古] 火腩飯

我每食完一碟火腩飯之後都會同我女朋友講分手。

因為我知道，佢已經唔再明白我。

佢唔知道我o係茶記所經歷過既有幾多。

佢問我食乜，我真係唔想答佢。

日本野？秦國野？真係膚淺。

究竟我仲可以繼續忍受自己既伴侶將d生既肉放入口。

每舊火腩都經過紅紅烈火，百度高溫。

係經過歷煉，係經過漫長既試鍊。

每一舊都有佢既歷史，佢既故事。

魚生究竟有d乜？根本就好似d白痴港女咁，一無所知，戇鳩鳩，生勾勾。

我恨我既人生唔可以好似火腩咁。

搵到咁多好既伴侶，豆腐，涼瓜，冬瓜，枝竹… 各有特色。

亦搵唔到咁多知音人。

有時侯，我自己一個坐o係茶記食火腩飯。

我覺得自己係孤獨，我覺得呢個世界係冇人明白我。

我叫左枝青島，我望住杯入面黃色既啤酒。

我望唔透，我望唔清究竟呢個世界仲有幾多野我係掌握到。

我好迷茫。

我離開間茶記，我俾錢既時侯發覺有個OL食緊枝竹火腩飯。

我望住佢，佢望住我。

我地互相點點頭。

我好感動，原來呢個世界仲有人係同我有相同既諗法。

我忍住淚水。

走出茶記，點起支煙。

頭都冇回就走返屋企。

或者個OL會問，點解我放棄呢一段咁難得既姻緣。

我唔知道。

o係呢一刻。

我覺得我係一個浪子。

火腩飯價格而家貴咗好多，有冇女朋友都唔想食。

續集下一篇：show me your love飯