「其實……女人個腦諗乜？」

吳十三 之 出賣土壤系列 流浪篇 ‧ 廿四

2024/06/04

「我想請教十三哥你好耐……」當年有幾個傳媒訪問過我後，久不久就有啲咁嘅客嚟約我。

「吓？你係想問乜先？」

「其實……女人個腦諗乜？」

「你實際個問題應該唔係咁樣……不如問你究竟經歷過乜嘢，先會問我呢個問題呢？」

「唔係呢……我真係唔明女人諗乜呀……溝女真係好難呀。」佢露出一副無奈嘅樣出嚟。

「原來係講溝女……不過你真係問錯人嘞，問個溝女成功率0％嘅人點溝女，咪即係問和尚借梳！」我摸摸自己嘅skinhead。

呢位客人外觀冇乜問題，目測約一米六，唔算高大，完全冇特點，係路人甲乙丙，睇完都唔會記得嘅類型。佢呢個款，性格正正常常應該唔會完全溝唔到女，如果完全溝唔到女十之八九都係幾個問題，其中一個就係性格唔正常，諗埋啲古古怪怪嘢居多。

「唓……你吹水啦！」佢食指對住我一伸一揚後繼續講：「……你喺訪問度都講年中都咁多女搵你開牌，咁點會溝唔到女得架？」

我搖搖頭。「咁你真係錯到絕啦……我真係唔識溝女架……」

「唏，我先唔信呀！咁你冇拍過拖咩？」

「有，咁又點？代表到啲乜呢？」

「咁你地點開始丫？」

「哇家陣我係占卜師定你係占卜師？你調返轉盤返我嘅？」

「咁我想知你點做丫嘛……」

我飲啖凍朱古力後慢慢對佢講：「我冇溝女，係啲女溝我啫。」

「屌！講呢啲！」嗰陣劉江meme圖都未出嚟。「你唔想教都唔使咁講啫。」

「又要我講，我講完又唔信，咁其實你究竟想我點呢？」

「你講到咁兩極，我好難信你講喎。」

於是我向Z經理揮手，叫佢過嚟。

「要乜嘢呀？」

「幾點收工呀妳？」

「今晚……收十一點。」

「一陣同妳宵夜。」

「你……梗得架喎……」

「咁我等妳收工。」講完呢句之後，我捉住Z經理隻手，蜻蜓點水式咁輕輕錫咗佢手背一下。

「咦，衰呀你，有客喺度望住架。」Z經理冷不防我呢招。雖然佢即時揈甩我隻手，語氣上係責備，但明顯係一路偷笑一路行返去cashier 。

同時間，我見到條友目定口呆。當然，佢唔知我同Z經理本身已經係認識，更加唔會知我同佢嘅關係。

「睇你都係仍然唔信架嘞，繼續當我吹水發噏風好過啦。」我繼續飲自己杯凍朱，然後睇佢反應。

「咁……不如問……點樣先會好似你咁『畀女溝』到？」

我即時拉一拉張櫈，坐直個身。「哇，要我親身教學呀？咁個價錢就另一回事囉！」

「乜……唔係開牌就得嘅咩？」佢講呢句嗰陣眉頭係皺起嘅。

「喂，而家要我親自教你喎，你覺得一次占卜嘅時間就搞得掂？你認真呀？我真係咁同你講你都驚我昆你啦吓哇？」

「……」佢俾我呢一句說話就收咗皮。

「你連少少付出都唔想的話，有冇諗過你喺出面踩咁多屎而浪費嘅錢係遠遠唔止呢個數呢？」

「咁……幾多呀？」

我向佢講出一個細嘅四位數，我非常肯定出面嘅所謂嘅溝女班一定貴過我好多。當然，我根本就唔想教佢，呢個價只係用嚟試佢嘅誠意同決心。

佢諗咗一分鐘，仲仍然係糾結中，正宗係一副諗樣。「我……返去諗諗先啦。」

「係啦，你繼續諗吓先囉，考慮清楚啲先丫，走先啦你。」

佢起身離開cafe後，Z就走過嚟。

「今次又係啲乜嘢怪客？」

「佢話叫我教佢溝女，但又唔信我喎，咁我咪搵妳做示範囉。」

「咦～」Z突然發起姣上嚟。「咁你家陣算係溝我呀？」

「頭先老點佢咋，佢試吓出面用我頭先同一方法丫，上咗差館啦！」

「你都未講你頭先係咪溝我……」

「算……一半啦！」

「咩嘢叫溝一半？係溝就溝架啦，邊有一半架？」

「另一半係我要妳溝返我……」

「溝你個死人頭呀白痴仔！哈哈哈。」Z打咗我心口一下。

「嗱，我溝咗妳一半呀，今晚妳要溝返我架！」

「好啦，我地互溝啦。」

隔咗兩個月左右，我約咗四個靚女朋友喺蘭桂坊玩，點知就喺大斜路度見到呢條友，同時見到佢有另外一個朋友一齊，不過兩個都柒撚懵懵甜筒輝咁嘅樣，佢地嗰套衫著到成個waiter咁，如果喺餐廳的話我會忍唔住叫佢同我落單，最要命係著到咁就好心佢地唔好戴紅紋石紫晶手串啦，完全唔夾成個look嘅。

佢一見到我左右兩側啲靚女，就大聲叫我：「哇十三哥！好耐冇見呀！」

我同佢只係寒暄咗幾句，同時間見到佢個friend就開始撩我班靚女friend講嘢，跟住連條友都轉咗同佢地四個傾，但美女們對呢兩條友全無興趣，乜都唔答，甚至西面。

「十三呀，不如我地快啲行好過啦！」其中一個靚女friend同我打晒眼骰，示意我唔好理佢地，跟佢地行。而家唔只三娘教子，而係四娘教子，我做仔當然遵從娘娘意思，俾其中一個拖住行上去。

行咗一小段路，見到佢地兩條友意圖想跟，我就擰轉頭同佢兩個講：「下次見啦。」，佢地先唔敢繼續跟上嚟。如果佢地真係跟住嚟，恐怕會搞到好尷尬。

上到Dragon-i，靚女原來book咗包廂，真係醒目。我地坐低後，就問幾位小姐頭先發生乜事。

「你嗰個乜嘢friend嚟架，咁柒嘅？一見到我就係咁chur我攞電話！」

「佢頭先呀一見到我就係咁講一堆明顯係背出嚟嘅嘢，好似念口簧咁，我都唔知佢講乜鳩，白痴架佢！」

「頭先同你講嘢嗰個呀，扮對眼放電電我，我以為佢眼抽筋呀！ 」

「喂條友同我講講吓嘢，扮晒冇心咁掂我手背呀！」

佢地都幾激動，投訴聲音此起彼落，於是我就開估：「屌！佢係我啲客嚟架咋，唔friend架！」

「咁就同你扮friend呀？好肉酸呀佢！哈哈哈！」

「Sorry各位靚女，下個round我請！」

「你話架！tequila shot！」

當然，呢個只係請女飲嘢嘅藉口，亦都係同美女建立良好關係嘅技巧。

後來同小姐們玩咗個幾兩個鐘，因為裡面人太多，成個場好焗，我自己行咗出去門外抖啖氣行個圈，點知我仲見到佢兩條蛋散已經行到上嚟雲咸街，仍然喺街度周圍攔人……

見到佢地呢啲行為同打扮，加上四位小姐嘅口供，咁我就大概估到乜事嘞。呢兩條友一定係跟咗唔知邊個上PUA班！

再之後幾個月，我又喺街撞到佢，不過今次唔係出去蒲，只係平日收工見到佢。

「都話你溝女勁架啦，上次咁多女同你一齊玩，正啦！」

「冇喎，冇溝過喎，啱玩就一齊架啦。咁你嗰晚又有乜嘢收獲呢？抄到幾多牌呢？」

「嗰晚都抄到近十個架。」

「十個不是重點，重點係十個之中，有幾多個真係約得到出嚟？」

「啲電話號碼冇個打得通……」佢講完，我忍笑忍得好辛苦。

「實際少少，想問一下咁耐以來，你交咗幾多學費？」

「兩……三萬到啦……」

「咁裝身呢？」

「都……花咗過萬……」

「咁都唔緊要，學咗咁耐有冇真係有個得手先？不論你溝到定係食到丫。」

「未，不過我覺得再努力一啲應該好快得。」

聽到後我無言以對。「好，咁你繼續努力啦。」

行到街口轉角，我先忍唔住笑出聲。丫，我唔記得再問佢一次而家知唔知「女人個腦諗乜？」，但係睇佢呢副表現，應該唔使問。

[ 註 ] - 筆者因多日通宵工作並參加考試，所以文章延遲刊登，敬請原諒。

﹙逢星期一刊登﹚

#吳十三出賣土壤系列 #出賣土壤開懷歡暢

#XIIITarot #VajraAccessories

===============================

好睇請俾like，課金當然制！

PayMe課金link： https://payme.hsbc/broxiii

【廟街占卜師實錄】經已出版！

https://www.facebook.com/photo/?fbid=986674096798172&set=a.496405429158377

吳十三 - 占卜師模式 Thread

https://www.threads.net/@XIII_Tarot

吳十三 塔羅占卜預約

https://www.facebook.com/VajraAccessories/posts/802864831845767

吳十三 偉特塔羅遙距課程

https://www.facebook.com/VajraAccessories/posts/2993703967588079

塔羅佬嚟，會呃你十年八年

名我唔開啦成日叫春嗰兩條友自己反醒下

醒下

太平洋海平面急降

我信八字都唔信塔羅，幾張牌就講到咁多嘢出黎咩

狗公狗咬狗骨仲好睇過睇人仆街

女人就好簡單，個個惟我獨專，

Cap盡身邊MK啲錢就轉會繼續搵食

有戀愛意識嘅，無個好人

Gooder就係唔識判女人死刑

俾女人玩好正常

至於無明子，念在大家都係NFJ，就贈佢一句：

搵得你上門嘅女人，肯定係寄生蟲

我唔係話我唔明女人諗咩喎