[自煮]台灣鹹水雞

今日係正常版本嘅台灣鹹水雞

要花啲時間整

一隻大嘅老雞髀，先浸鹽水解凍，去雪味+血水

然後洗乾淨

凍水落，加香葉/花椒/胡椒/八角/葱/薑/鹽

再加米酒/紹興酒

大火煮滾轉中細火煮5、6分鐘

熄火冚蓋焗10分鐘←視乎幾大隻，時間再加減

夾起雞髀浸冰水，又或者放入雪櫃雪一陣

咁雞皮先會爽脆

然後斬件

煮雞嘅湯汁隔渣，留兩至三湯殼，加大量胡椒鹽

雞件加蒜粒/薑絲/葱粒/芫荽

加麻油，加湯汁撈勻

記得等五至十分鐘入味再食

咁就勁台灣味

成日食雞

呢隻薩摩雞髀抵買

一包兩隻，隻髀有半隻雞嘅size

聽落好似唔困難

其實係咩味未食過

一直好好奇

老母雞嘅雞皮先做到爽脆嘅效果

味道係鹹得嚟好香胡椒+麻油味，

肉有咬口同重雞味

但最重要係雞皮一定要爽脆

之前試咗香港好多間鹹水雞

嫌太嫩太滑，同埋好勁雪雞嘅味，

最後就自己試整

發覺一定要買返台灣出嘅麻油同胡椒鹽，

先做得返台灣食嘅味

另外仲要一定用老母雞，先會有咬口同皮係特別爽

原來係咁感謝分享

疫情唔過睇怕都去唔到台灣食下正宗味道

74.719/100

正呀

網上有代購,

不過選擇得西門町嗰間萬國滷水

同埋價錢唔平

因為我勁鍾意食鹹水雞

去襯台灣都必買嚟做消夜，

幾乎一見到就買嚟試，食過好多間，中過好多伏

但最鍾意都係台北通化夜市門口嗰兩檔，

台南就台南戲院對面有一檔都好食

感謝推介

有機會去試下