將習近平同中共切割、中共同中國切割，定係將中國共產黨同中華人民共和國專政體制分開、將習派同中共其他勢力分開？

應對中共對美國嘅挑戰，美國嘅戰略報告訂明咗要將中共同中國人民分開，用自由世界改變共產中國。消滅中共分兩個步驟，第一係將習近平拉落台，令中國重返2013年前道路，返到習近平之前嘅戰略狀態，第二係將中共同中國切割，逼佢改變或者解散。

但表面上講係咁講，但實際又係咪咁做？或者表面上咁做，但暗地裏又做緊相反嘅嘢？

集中於打擊習近平，睇落係精準打擊，但效果唔單止係令習近平、中共、中國三者愈箍愈緊、愈嚟愈集權，而且目標只不過係令佢變返2013年前狀態，變相係幫佢續命。

所以懷疑背後係咪有另一套方案，就係按相反思路進行，將中國共產黨同中華人民共和國嘅專政體制分開，將習近平嘅派系同中共內部其他勢力分開，實現另一套精準打擊方案，先改變習近平同相關派系，利用習近平同相關派系解散黨內其他勢力，然後改變中國共產黨，令中國共產黨結束中華人民共和國人民民主專政，實施立憲民主憲政。