郊登J-POP研究學會 (1) 平成末→令和初 日本樂壇嘅起伏

音樂
#1 九七淪陷
04/06/21 14:48

令和,係日本現今嘅年號。平成由1989年起經過咗30年,2019年明仁天皇退位,德仁天皇登基,標誌著令和嘅開始。令和前後,日本樂壇亦走入新時代。以下落黎,會簡述一吓近幾年日本樂壇究竟有咩大變,同大家一齊揭開J-POP嘅新一頁。

聽歌模式嘅轉變

相信大家都知道,2000年代初係CD最後嘅風光時刻,2003年電話鈴聲下載呢個模式被引進市場,2008年iPhone嘅普及更令音樂下載漸漸變成主流,不論係香港、歐美定日本都無例外。到咗2013年Spotify登陸日本,Apple亦喺2015年發行Apple Music,但係日本音樂業界對參與串流平台比較消極,所以市場發展得比較緩慢。

2017年後期、越黎越多知名歌手向串流伸手,例如10月有DREAMS COME TRUE,12月有宇多田ヒカル。同時期,串流市場嘅銷售份額亦首次超越下載市場。→

講到串流平台最初嘅黑馬,相信就係2018年嘅あいみょん。2018年7月,あいみょん推出佢第5隻單曲唱片『マリーゴールド』,雖然喺CD銷量同下載數字上冇取得亮麗成績^,但係喺串流平台嘅排行上就名列前茅。あいみょん之所以可以謂之黑馬,唔止因為佢只憑著串流成績就出演年尾紅白,一改串流未受重視嘅風氣,出演之後更加令佢多首歌都佔據咗串流排行榜頭幾名接近半年,盛極一時。

^直至2018年年尾,佢有兩首歌得到10萬下載,相對同年第1位『Lemon』有180萬,第10位『here comes my love』都有28萬嘅下載量黎講,可謂相當唔顯眼,而兩首歌嘅CD銷量當時亦都係得僅僅1萬。

時至2020年,串流市場(ストリーミング)規模已經係下載市場(ダウンロード)規模嘅3倍。雖然串流市場對於唱片公司同Artists黎講係比傳統音樂銷售模式難賺錢^,但係最終絕大部分嘅歌手都係冇得唔登上呢隻船。例如2020年初嘅サザンオールスターズ.嵐、2020年中嘅米津玄師、上個月嘅B’z,幾日前嘅西野カナ。

^歌手嘅收入係有可能低至每播放1000次得1蚊港幣收入(Apple Music),免費嘅Youtube更係低至每10000次1蚊。… … 加上點播永遠集中喺最熱門流行歌曲,如果出EP或者大碟,曝光率本身低嘅歌曲只會獲得相對上極少嘅播放數。而且無可否認,登上串流之後係會令本身CD銷量同下載量下滑。

題外話,喺郊登遠近馳名又未登船嘅日本歌手(V.A.),相信得返THE [email protected]

YOUTUBE由宣傳渠道轉化成爭鋒嘅戰場

自2005年Youtube上架以黎,高速發展,而家已經成為人類生活嘅一部分,甚至乎成為電視嘅替代品。唱片公司對Youtube嘅態度亦都喺短短十幾年間大幅轉變,由最初怕佢因為有大量免費侵權上傳而影響自已生意,到慢慢有部分公司嘗試放半首MV上去宣傳,再去到今時今日成為兵家必爭之地。

近幾年,Youtube既成為音樂串流平台,MV嘅播放數亦成為一首歌有幾熱門嘅一項指標。無論係Youtube本身、Oricon公信榜同Billbroad JP流行榜都將相關嘅數值每星期展示。即使係一直抗拒上傳MV,驚會影響CD銷量嘅唱片公司/事務所,到咗呢個時代都冇辦法繼續脫節落去,歌曲發售前後,開放串流同公開Youtube MV已經成為常態。而家上Youtube,唔難發現近呢幾年有唔少知名歌手過去嘅MV亦都上傳咗去所屬嘅頻道,可見MV嘅定位已經同CD嘅年代唔同咗。

流行指標嘅劇變

如果睇返2010年至2019年嘅單曲CD銷量排行,會發現第1位全部都係AKB48,頭10名甚至頭幾十名都係由偶像團體佔據,如果單憑呢個排行榜,根本冇辦法搵到真正流行嘅J-POP,但係日本業界偏偏就忽視其他流行指標,例如實際顯示出流行程度嘅收費下載,令到00年代中旬至10年代中旬有好多流行歌曲同歌手冇得到足夠嘅評價。

串流平台興起嘅同時,業界終於一改過去對歌曲評價重視於CD銷量嘅脫節思維。2017年起,無論係Oricon定Billbroad,仲有電視音樂節目都大幅改革原本嘅排行榜,特別係Billbroad Japan Hot 100,唔再過度重視單曲CD銷量,令到AKB48❝一強❞時代結束。唔知係巧合定偏見,業界對流行歌曲同歌手有返正當嘅評價之後,J-POP畀人印象回復返唔少生氣。

AKB坂道嘅式微

講起AKB48,大家嘅印象係咩?握手券?總選舉?AKB48自從名聲大噪之後,一直喺CD銷量上獲得驚人成績,頻頻賣出百萬張單曲CD,不過轉手就被丟棄嘅CD亦所計無數,原因相信都街知巷聞,係因為AKB Group非常依賴以握手為首嘅接觸活動,FANS為咗接觸而重複大量買入相同CD。雖然呢個市場行為令人留低AKB Group嘅銷量同FANS數目遠遠唔成正比嘅印象,但係AKB Group係確確實實咁成為過大眾流行嘅歌手團體。

從2010年嘅『ヘビーローテーション』到2013年嘅『恋するフォーチュンクッキー』,AKB48喺4年間推出咗6首達成100萬下載次數嘅歌曲。毫無疑問,呢幾年AKB48真係流行過,唔係淨係得握手握出黎嘅數字。不過自2013年開始,AKB48雖然一直佔據單曲唱片流行榜嘅榜首,但係流行歌就幾乎皆無,除咗2015年年尾推出嘅「365日の紙飛行機」得到50萬下載次數,就再無一首歌係普及到大眾都識。即使位於榜首,AKB48嘅大眾流行時代早已告一段落。到咗2020年年底嘅紅白,AKB48無咗縱影,但係坂道就有3隊出演,呢個現象可能就象徵咗AKB同坂道嘅世代交替。

至於坂道嘅歌曲有冇流行過?對比AKB48黃金4年嘅成績,好遺憾坂道嘅表現就遜色得多。雖然乃木坂46成功賣到百萬CD,但係歌曲下載黎講就無顯著表現,多首歌嘅下載次數僅僅破到10萬。不過,同返AKB48比較,AKB48自2016年就再冇歌曲破到10萬,相比起上黎乃木坂46喺2016年後其實已經比AKB48出色。

正值2016年乃木坂超越AKB之際,耳目一新嘅欅坂46出道,推出嘅『サイレントマジョリティー』達到50萬下載,令坂道出現第一首可以稱得上做流行於大眾嘅歌。2017年係欅坂46嘅全盛期,喺串流平台上拎到佳績,更喺Billboard上成為當年僅次於星野源嘅年度歌手。好景不常,欅坂46嘅流行相當短暫,可能係因為樂曲嘅方向漸趨偏門,2019年開始欅坂46喺串流上漸漸守唔到高位。

AKB坂道喺2020年更受到武漢肺炎重創,依賴接觸活動嘅佢哋更加變得舉步為艱。綜合黎講,AKB Group自2013年起走向下坡,2017年前後坂道一度有機會吹起新嘅風,不過最後都未能夠走入流行嘅道路。

平成最後嘅煙花

90年代出道嘅SMAP、安室奈美恵、嵐相繼喺2016年、2018年、2020年引退/休止,不論理由係咩,都成為前後兩年嘅大話題,精選大碟嘅銷量亦相繼創出自從CD產業退潮後多年冇見嘅100萬、200萬等佳績。三組歌手嘅事跡就唔詳講,相信呢啲數字日後係難以再見(除咗米津玄師),可謂CD產業最後嘅煙花,而煙花背後亦伴隨大量實體店舖結業。

Vocaloid音樂進入主流視界

Vocaloid,係2007年開始以初音ミク為首發行嘅一個音樂製作合成軟件,任何人都可以用呢套軟件作曲、然後配上合成音聲,完成一首歌。當時正值影片網站niconico嘅興起,兩者一拍而合,大量業餘音樂人將歌曲上傳到niconico,成為一個新興文化。Vocaloid嘅全盛期由2009年去到2013年,呢五年相關嘅CD總銷量超過300萬。雖然係咁,Vocaloid始終停留喺次文化,2015年小林幸子喺紅白熱唱「千本桜」嗰時,相信唔少民眾都係第一次接觸Vocaloid樂曲。

VocaloP泛指經由初音ミク等Vocaloid推出歌曲嘅業餘音樂人,自從Vocaloid走入全盛期,呢啲音樂人亦都走向專業化,向商業歌手提供樂曲,當中亦有成為唱作歌手出CD嘅人。時至2017年,VocaloP喺主流音樂市場嘅地位出現巨變,因為呢年出現一首大熱歌曲,由米津玄師

作曲作詞,DAOKO×米津玄師主唱嘅『打上花火』,動畫電影<打ち上げ花火、下から見るか?横から見るか?>嘅主題歌。

『打上花火』席捲串流平台,Youtube MV播放數急速增長,短短半年下載數突破50萬,亦成為Billbroad年度歌曲第3位,仲帶咗DAOKO出演2018年嘅紅白。呢首歌推出當時米津玄師已經係VocaloP之中嘅領頭人物,2014同2015年出嘅兩隻專輯亦都以破10萬嘅成績長期出現CD排行榜,2017年出嘅動畫主題歌<3月のライオン>嘅『orion』同<僕のヒーローアカデミア>嘅『ピースサイン』亦有相當好嘅成績,最終『打上花火』令佢攻入埋主流市場,11月推出嘅專輯大碟以首週銷量16萬嘅成績登場,短短1個月大碟已經打入年度20位以內,不過冇人諗到,呢個只係一個前奏。

2018年初TBS電視劇<アンナチュラル>嘅主題歌『Lemon』得到驚人嘅注目,下載數超越300萬次,呢首歌令米津玄師一舉成為日本最紅歌手。同年本田汽車起用2年前嘅『LOSER』做廣告歌曲,令到2018年下半年兩首歌一直佔據下載排行榜嘅高位。2019年以欖球為主題嘅電視劇「ノーサイド・ゲーム」播出,日本牽起欖球熱潮(日本係當年欖球世界盃主辦國,最終擠身8強),而同劇主題歌『馬と鹿』就係由米津玄師擔當,呢首歌亦錄得超過100萬下載。除此之外,米津玄師喺樂曲提供方面都得到成就,除咗『打上花火』,仲有Foorin嘅『パプリカ』同菅田将暉嘅『まちがいさがし』,都一一成為紅白歌曲。連番嘅成功令米津玄師完全確立咗佢喺樂壇嘅地位。由次文化嘅VocaloP走到日本主流市場嘅頂峰,10年前絕對冇人想像到嘅事咁就發生咗。

2020年至今,VocaloP為日本樂壇繼續帶黎衝擊,甚至令Vocalo風格嘅樂曲同MV充斥主流排行榜。米津玄師雖然係VocaloP,但係佢出名之後嘅樂曲都係傾向傳統J-POP嘅風格,不過2020年起成名嘅VocaloP就有啲唔同。講例子,Eve、yama都係新興走入主流視界嘅Vocalo風格嘅歌手,Youtube嘅MV排行榜上方長期見到P丸様。(ナナホシ管弦楽団)同Chinozo嘅身影,仲有之前有人提起嘅❝夜行性❞,即係ずっと真夜中でいいのに。同ヨルシカ,不過呢度實在講唔哂,所以呢啲歌手都唔係主要介紹對象。咦,係咪漏咗邊個?係,❝夜行性❞仲有一組,就係YOASOBI,2020年牽起一鼓新旋風嘅組合。

2019年11月,YOASOBI嘅『夜に駆ける』喺Youtube公開,作為一首冇TIE-UP嘅樂曲,當時完全冇大眾知名度,發行3個月先至首度登場串流嘅排行榜,但係呢首歌一步一步變得越黎越有人氣,最終更成為2020年最熱門,第1首冇發售CD而奪得Billbroad年度首位嘅樂曲。

就好似2019年嘅あいみょん、2020年嘅Official髭男dism咁,如今你會發現,串流平台嘅排行榜上會見到多首YOASOBI嘅歌曲居於上位。而喺近期,又出現另一個Vocalo風格嘅歌手,Ado。

2020年10月,Ado推出『うっせぇわ』,同樣係冇TIE-UP嘅樂曲,『うっせぇわ』以驚人嘅氣勢,非常具攻擊性嘅歌詞同聲線短時間內打入主流市場。打開Youtube,恍惚返咗去10年嘅niconico,但係見到嘅就係100倍嘅播放數,Vocalo音樂,真真正正打入主流,雖然唱嗰個人唔係初音ミク。值得加筆嘅係,Ado並唔係由固定嘅作曲家製作音樂,所以佢每首歌風格可以好唔同。『踊』係推出咗1個月左右嘅歌曲,同樣冇TIE-UP,亦都成功流行到。

TikTok嘅暗湧

瑛人『香水』、優里『かくれんぼ』『ドライフラワー』,有咩共通點?呢啲都係被認為從TikTok廣傳後一舉成名嘅樂曲。『夜に駆ける』、『うっせぇわ』都被傳有同樣嘅跡象。難以否認,TikTok喺後生世代中滲透度上升,歌曲喺呢個平台被使用做短片嘅伴曲或者被翻唱,廣傳後隨時有機會喺TikTok突圍而出(當然TikTok以外,Twitter、LINE同IG都係重要嘅傳播工具),唔駛依賴電視劇、電影、CM或者動畫等嘅TIE-UP,一反傳統咁變成一首流行歌曲。究竟TikTok嘅實際影響力有幾大,日後又會點樣影響日本嘅市場生態,好難估計。

最後送畀大家

其實仲有韓流同Johnny’s可以講,但係我諗呢兩個Topic應該最少人感興趣,所以就省略

多謝你睇咗個咁長嘅Post下個Post將會提到近年最有代表性嘅歌手, 部分喺呢個Post都提過

#2 空殼
04/06/21 14:56

第一個支持

#3 ☝️
04/06/21 14:59

#4 腐毒
04/06/21 15:03

#5 腐毒
04/06/21 15:04

好開心日本人終於捨得將啲歌放上youtube

#6 九七淪陷
04/06/21 15:05

好開心日本人終於捨得將啲歌放上youtube

#7 九七淪陷
04/06/21 15:06

第一個支持

#8 九七淪陷
04/06/21 15:06

#9 女鬼夜行
04/06/21 15:46

似乎最新趨勢係去大台化? - bypass左唱片公司

用自己圈子入面既專人負責自己個part?

#10 九七淪陷
04/06/21 15:56

似乎最新趨勢係去大台化? - bypass左唱片公司

用自己圈子入面既專人負責自己個part?

全部登上寶座嘅歌手都經咗商業出道

都係大手公司,SONY、環球唱片、PONY CANYON、華納唱片嘅人

#11 九七淪陷
04/06/21 16:13

似乎最新趨勢係去大台化? - bypass左唱片公司

用自己圈子入面既專人負責自己個part?

全部登上寶座嘅歌手都經咗商業出道

都係大手公司,SONY、環球唱片、PONY CANYON、華納唱片嘅人

或者咁講, 不論係作曲作詞嘅人定係製作MV嘅人都由業餘走向專業化

咁好自然呢啲音樂人亦會成為同歌手/唱片公司合作嘅選項

#12 J 電視臺
04/06/21 16:45

正皮

#13 九七淪陷
04/06/21 16:47

正皮

#14 深作欣宜
04/06/21 21:43

我以為你會講宇多田m娘個堆講起 一黎就跳去akb 點出下文

#15 Helen杜如風
04/06/21 22:13

光妹<3

櫸阪好似係因為平手走左所以沒落左?冇跟開48系列唔太清楚

#16 深作欣宜
04/06/21 22:26

Johnny有性趣味喎 特別佢地啲花生 之前有人出書爆入面有枕營業 最衰冇中文版 想知本書堅定流?

#17 九七淪陷
05/06/21 03:20

Johnny有性趣味喎 特別佢地啲花生 之前有人出書爆入面有枕營業 最衰冇中文版 想知本書堅定流?

我唔熟咁多八卦嘢

本身我都係想講吓個market多啲, 講人物都係想著重返樂曲, 表面咁講吓有咩hit咁

唔係最hit嘅都唔多講, 因為講唔哂

#18 九七淪陷
05/06/21 03:34

光妹<3

櫸阪好似係因為平手走左所以沒落左?冇跟開48系列唔太清楚

如果講樂曲嘅大眾流行程度走下坡, 就係平手走之前嘅事

有人就認為欅坂向下嘅原因係因為樂壇有其他新星一口氣拎走咗大眾焦點

不過平手走, 我諗的確係令好多fans對欅坂失去咗興趣

anyway, 我都係最近先知佢改埋名做櫻坂, 真係冇留意開

而家櫻坂嘅氣勢可能仲弱過日向坂

#19 壞過凱婷的樂高
05/06/21 04:04

光妹<3

櫸阪好似係因為平手走左所以沒落左?冇跟開48系列唔太清楚

如果講樂曲嘅大眾流行程度走下坡, 就係平手走之前嘅事

有人就認為欅坂向下嘅原因係因為樂壇有其他新星一口氣拎走咗大眾焦點

不過平手走, 我諗的確係令好多fans對欅坂失去咗興趣

anyway, 我都係最近先知佢改埋名做櫻坂, 真係冇留意開

而家櫻坂嘅氣勢可能仲弱過日向坂

由政府出聲話要J-pop再流行似乎唔係好事嚟!

#20 石原幾時拍av
05/06/21 09:16

光妹<3

櫸阪好似係因為平手走左所以沒落左?冇跟開48系列唔太清楚

如果講樂曲嘅大眾流行程度走下坡, 就係平手走之前嘅事

有人就認為欅坂向下嘅原因係因為樂壇有其他新星一口氣拎走咗大眾焦點

不過平手走, 我諗的確係令好多fans對欅坂失去咗興趣

anyway, 我都係最近先知佢改埋名做櫻坂, 真係冇留意開

而家櫻坂嘅氣勢可能仲弱過日向坂

任何偶像都有佢生命週期 開始收皮係正常 強如48、m娘都一樣

#21 Helen杜如風
05/06/21 15:50

光妹<3

櫸阪好似係因為平手走左所以沒落左?冇跟開48系列唔太清楚

如果講樂曲嘅大眾流行程度走下坡, 就係平手走之前嘅事

有人就認為欅坂向下嘅原因係因為樂壇有其他新星一口氣拎走咗大眾焦點

不過平手走, 我諗的確係令好多fans對欅坂失去咗興趣

anyway, 我都係最近先知佢改埋名做櫻坂, 真係冇留意開

而家櫻坂嘅氣勢可能仲弱過日向坂

任何偶像都有佢生命週期 開始收皮係正常 強如48、m娘都一樣

步姐光榮半引退

#22 奸笑
05/06/21 16:19

你係唔打算由大正昭和講起

真係可惜呢

#23 九七淪陷
05/06/21 16:49

你係唔打算由大正昭和講起

真係可惜呢

wiki話J-POP呢個詞係平成開始先有

J-POP呢個造語誕生初期最暢銷嘅單曲CD係出荷枚數160萬枚以上,B.B.クィーンズ嘅『おどるポンポコリン』

#24 九七淪陷
11/06/21 12:08

24

#25 古龍味貓貓
11/06/21 13:05

我要全盛時期嘅中森明菜

#26 九七淪陷
11/06/21 13:09

我要全盛時期嘅中森明菜

要返昭和

#27 愛浦心
12/03/22 16:36

幾時出2

#28 巨無霸餐
12/03/22 16:39

#29 凍水雨
12/03/22 16:55

幾時出2

agggg

#30 巨無霸餐
12/03/22 17:03

幾時出2

agggg

唔會有2嫁啦

#31 艾爾登法環的樂高
12/03/22 17:16

我要全盛時期嘅中森明菜

要返昭和

幾驚你話要山口百惠

#32 劉病已
13/03/22 12:55

其實成日路過秋葉原都會諗起AKB去咗邊

#33 橘ありす老豆
13/03/22 13:13

我要全盛時期嘅中森明菜

要返昭和

幾驚你話要山口百惠

要唔要佢新抱

#34 九七淪陷
13/03/22 13:39

幾時出2

agggg

唔會有2嫁啦

要有討論先有動力出post

雖然郊登得嗰十幾廿人, 我都明一隻手掌拍唔響

#35 九七淪陷
13/03/22 13:42

其實成日路過秋葉原都會諗起AKB去咗邊

個劇場唔係仲開緊咩

#36 艾爾登法環的樂高
13/03/22 13:45

要返昭和

幾驚你話要山口百惠

要唔要佢新抱

山口奶奶會唔會教聲傻唱歌.

本主題共有 36 則回覆,第 1 頁。