論香港人嘅疲累，自我孤立及分化

TLDR 1 : 政治乃眾人之事，大眾嘅想法比你嘅想法重要。

TLDR 2 : 每一個香港人都係有血有肉嘅人，請避免用非人嘅角度去批判同過度要求，多關心每一個人。

第一部分: 政治乃眾人之事 人性永遠為最大考慮

過去依兩年入面，見住整場運動由燃起，到高峰，再慢慢結霜，當中有唔少我個人認為係太不近人情嘅想法同表達，普遍地違反人性。

但政治係人嘅事，更加係巨量人民嘅事，所以重點應在爭取人嘅信服同支持，了解平常人嘅考量，而唔單係將自己嘅想法加諸別人之上。

而依種做法其實就係過去經常出現嘅情緒勒索，透過講述義務，責任，恐懼，罪惡感去驅使人做特定嘅事情。

例如「你咁做對唔對得住X」「依家唔做就會X」「你所受嘅比起X算得啲咩」「點解冇人講X」「X都做唔到學咩人講X」之類

佢地分別大約對應 罪惡感 恐懼 責任 義務 依啲要素。

除咗PR同五毛，其實出post者往往係係一種氣憤，失望，恐懼情況下嘅錯誤表達(當然有啲可能係本身表達有問題)，佢地身上往往有住同樣嘅罪惡感同恐懼，所以下意識覺得依啲野對其他人都有一樣嘅作用。

一時嘅，少量嘅情緒勒索其實可以達到有效動員嘅效果，只要件事合理，依啲言詞可以激起到警覺性同自我保護嘅反應，令人能夠比平日更加進取，勇敢地去行動，依種亦係運動早期嘅情形，遍地開化，流水多變。

但隨住大家係大環境下遇到更多挫折，情緒勒索一而再再而三咁出現，常人嘅心理能量就會被耗盡，負面情緒會直接地影響心理狀態，反覆之下會令依啲負面情緒變成真實嘅威脅，為咗唔好再被激起反應同隨之而黎嘅情緒，常人會自動選擇麻木，為咗保護自己而放棄更高嘅追求。

每個人承受能力有別，底線唔同，所以你可能會比人更堅強勇敢，或者更脆弱，而更能承受有更高追求嘅人，就係我係上一篇文所提到嘅英雄。

當一件關連到眾多負面情緒嘅社會運作持續，又未有起色時，參與者就會慢慢退卻，正如你一開始打j會覺得好痛掂都叫救命，直到你打足一個鐘都冇feel。

人嘅情緒同心理亦如是，假如我地過份動員身邊嘅人，直到佢地冇曬能量都冇得抖，好快地佢地會絕對麻木甚至倒過黎反對你。

唔好覺得冇上街冇衝突就係休息緊，每日嘅新聞轟炸，過去嘅創傷，對未來嘅絕望，通通都係到不停消耗同路人嘅力量，個啲被消耗殆盡嘅就變成抑鬱等心理疾病，我好肯定大部份身邊都至少有一個人因為今次革命而變得鬱鬱寡歡，至少我身邊有

試問咁嘅情況下，你仲點要求佢地同你一齊走上街頭對抗暴政？

假如你係比較堅強，仲抱有希望嘅一位，其他你首要嘅任務唔係點樣去用你嘅力量扶起身邊嘅人，唯有提供正面嘅情緒先可以令大家有返信心去繼續作戰，亦係重燃抗爭之火嘅唯一方法。

政治乃眾人之事，人係社會運動中最重要嘅資本，所以點解我係上一篇文到好強調我地都係平常人，唔應該假想自己係超人，如果想社會運動成功，每一件事都要為普遍人而想，用平凡廢柴嘅角度出發，當大家重拾信心之時，自然會有英雄企出黎。

結論及建議篇

基於上述嘅想法，其實我地有幾樣野好需要，必要，急需去做:

一)自我保護

細心觀察自己嘅心理狀態，係咪成日好無力，好憤怒，係嘅仆街啲咁講快啲睇醫生，搵朋友傾下，唔好自閉，病人係革命唔到的。

可以嘅搵個一樣無力嘅朋友，互摑對方一巴:

「死廢柴，不過我地都係有血有肉會攰嘅人，我地互相扶持重新出發啦。」

二)共同對抗定無形壓迫

係你想召集其他人同你一齊做任何事之前，重覆睇清楚自己係以理信服人，正面鼓勵人，定用負面情緒&責任去要求人做野，你到底係邀請緊人同你一齊為公義努力，定比緊壓力人？

三)人性化

你所講所做嘅野，合唔合符人性？(追求安全感，穩定，正面，利益) 唔係話只能做好人性化嘅事，但理論上貼近人性嘅野，自然會得到更多人支持。點解黃店多人支持，寫信咁少？因為食飯係人嘅必需，寫信唔係。當你想其他人參與寫信嘅時候，就要考量點講先會令人說服。

係因為依個係無可逃避嘅責任？定係因為被定罪嘅手足同我地一樣有血有肉，一樣需要關心，一樣想知道有人陪係自己身邊？我寫信係因為我地同獄中手足都係香港人，好平凡嘅人，所以我想佢地都可以同我一樣感受到溫暖，唔洗孤伶伶一個人。

嘗試用正面嘅想法將唔同嘅人連結埋一齊，先可以做到齊上齊落。聖誕節一齊寫張小小嘅卡比我地嘅身在獄過朋友好冇？

四)改變定突變？

當你提出一個建議或行動嘅時候，你係期望緊大家改變定突變？ 意思同上面同出一轍，當我地想大家做一件事嘅時候，例如想大家上返街抗爭，依個舉動係咪接近佢地嘅現況？我明白大敵當前，有好多野唔輪到你話冇力要抖，但我希望你唔好因為其他人做唔到而過份怪責佢地，包袱依樣野係真，攰同無力都係真，我地唯一可以做嘅係嘗試重新由淺入深。

係好似湊細路咁，但人係獨立嘅個體，唔係你隨便就迫得黎，係一整場運動嘅角度而言，最重要嘅係令最多嘅人參與，比信心其他人，切忌夾硬黎。

五)放開思維

人係失望同壓力下，好容易會變得固執，要記得凡事都可以同應該努力，但唔係凡事都努力咗就一定會成功，努力都要係人嘅限度之內。

唔係叫你乜都唔好做，而係要將「我一定要做啲野」成為你嘅態度，而非「我一定要做依件事」 流水革命需要嘅係可能性同變化。

篇幅及能力有限，未能夠寫到好實際嘅計劃定乜，但絕對唔係話行動唔重要，唔係話乜都唔洗做抖就得，純粹係希望香港人唔好忽略政治唔止係你點諗，以及每個人都有血有肉有情緒，唔好用錯誤嘅方式令自己同其他人被壓死