隔牆有耳：港航復飛台　網民擬夾錢︰機會嚟喇佳佳（李八方）

陳同佳涉嫌喺台灣殺害女友潘曉穎，話去台灣自首到𠵱家都冇行動，潘母近日接連受訪，叫陳同佳快快履行自首承諾。噚日香港航空fb出po，話為方便赴台學生同有需要往返港台嘅旅客，將於10月15日起恢復香港往來台北嘅航班，好多網民見到呢個po，唔係諗好快可以去台灣玩，而係諗點送陳同佳去台灣自首。

讚港航「反應迅速」

有人留言：「為慶祝重開航班，名字中同時有『陳』、『同』、『佳』三個字，即送單程機票一張」、「一人夾一蚊，比（畀）個機會佳仔佢坐完頭等艙去坐監倉」、「一人夾一蚊，包機都得」，有網民又讚港航「反應迅速」，「一知道阿佳冇機返台灣，就開台北。撐港航，急香港人所急」、「港航送張單程票比（畀）佳仔啦」，又有網民話，送機票唔係問題，「點先令佢上機係問題」，仲有人燒到陳同佳「代言人」、聖公會教省秘書長管浩鳴身上，「管生話陳生等緊時機『機會嚟喇，佳佳！』」

不過有人留言揶揄，話陳同佳𠵱家住豪華安全屋，仲有保鑣，「包食包住點會走呀！」