中美開唔開戰我就唔識估，不過風險的確係越嚟越高

短期內雙方都未準備好，而家啲「備戰」工作都只不過係「如果要打就有準備」嘅意思，短期內大規模開拖嘅機會甚低，但兩三年後直接交鋒嘅機會係有嘅。

如果真係開拖，實際上有啲咩風險呢？(係咪會用核彈炸咗香港？)

美國主動「入侵」中國大陸嘅機會甚低，始終美軍冇可能「佔領」任何中國土地，極其量都只(?)會係用各式遙距襲擊破壞中國境內有軍事或經濟價值嘅目標。(按：當然包括核彈)

另一邊廂，中國最有可能「入侵」嘅地方就係台灣。所以中美開戰嘅話，身處台灣嘅人可能最危險。

以人身安危計算，香港反而低風險。香港地冇特別嘅軍事價值(除咗作為間諜落腳點 -- 不過正因為咁所以唔會被美軍炸)，又有多國公民(尤其包括美國人)居住，美軍冇理由以大規模殺傷力武器襲擊香港地區。一旦誤傷啲身嬌肉貴嘅各國商人，引發外交災難就得不償失 (同埋最大鑊嘅會係「內交」災難。美國人殺敵國人民絕對唔會眨眼，不過一郁到本國人民就大即刻唔同晒)。美國若要破壞香港對中共嘅價值，用經濟手段即可，例如大規模制裁，甚至係下令美資全面徹離。香港經濟冇咗美國支持就會起碼唔見咗一半，所以美國喺出盡經濟手段之前，係冇咩可能用軍隊襲擊香港嘅，唔會有人炸自己啲嘢咁 on9。若中美開戰，香港嘅危險主要係暴亂或內亂，而唔係戰亂。最有可能「攻港」嘅軍隊係解放軍，無論係為「平亂」定係為清除「清除後顧之患」(eg. 香港人=間諜)，中共都有唔少強制接管香港嘅動機。除此之外，喺香港仲有一種人身安危嘅風險就係各方勢力進行暗殺嘅時候中副車，或者搵咗你做替死鬼。不過放心，喺美國人全面徹離之前，你係唔會中核彈嘅。

香港最大可能出事嘅位，其一就係經濟會完全停滯，第二就係必需品會好難取得。中共若果輸緊然後覺得香港太多間諜漢奸，好有可能係直接封鎖關口等你香港人自生自滅 (你可以話係「變相獨立」)。後果當然係斷水斷糧，可能斷埋電同網。留意中美開戰初期未見輸贏中共係冇理由咁做，只不過「狗急跳牆」嗰陣呢招一定對中共最高師令好大誘惑嘅。

移民又點呢？雖則話台灣最高危，但任何連接太平洋嘅國家都有可能被卷入戰爭 (係呀反而香港「打仗」嘅風險最低。你可能會餓死或者俾警察打死，不過唔會係「打仗」死囉)。而歐洲諸國因為 NATO 嘅關係，亦都未必會袖手旁觀 (當然伊戰嗰單「大殺傷力武器」搵唔撚到之後美國仲有冇能耐道德感召歐洲各國幫拖就係另一問題)。香港人移民外國最大嘅「危險」就係歧視。當連 COVID 都令到亞洲人樣嘅人喺外國被歧視，若中國真係變「敵國」可想而知。(唔會有人check你有冇BNO先決定歧唔歧視你架 -- 不過而家練定蕭叔叔口音都會有啲幫助嘅) 而所謂「歧視」唔係淨係拖你入後街打一身咁簡單，可以係成村人大舉攻擊華人社區嗰種 (可以參考下印尼排華係點玩法)。至於呢啲嘢嘅風險有幾高，我唔識 quantify，真係要睇嗰個國家或地區嘅治安係點喇。一般嚟講大城市比較多元，本身多唔同國籍嘅人居住，歧視問題冇咁嚴重⋯⋯不過打仗嘅話大城市梗係相對高危嘅目標啦 (一個核彈就GG ^O^/)。

所以，如果驚死嘅話應該點？計我話作為「中國香港人」，最低風險嘅做法，係而家買定幾斤黃金，一旦開戰就走到啲咩武漢成都呢啲內陸城市住返一陣睇定啲先。照計中共唔信任香港人又冇理由向香港人徵兵，打又唔會打到咁遠，問題只係你有冇本事保得住嗰幾斤黃金咁解啫。(呢個係減低「死」嘅風險，自由人權呢啲嘢就放心啦，戰時一定冇晒架喇，邊度都係)

唔驚死嘅話，當然係 #犧牲就係意義，意義係個人價值嚟，冇話咩啱定唔啱嘅。話時話，如果想發國難財嘅話，其實絕對可以搏中美雙方都唔郁香港，馬照跑舞照跳，香港做返老本行「轉口」(aka 中共白手套)。不過呢招就算今日真係未必work喇，始終美帝一句「Hong Kong 就是 China」就收晒你皮 （不過可能歐洲國家仲buy一國兩制嘅⋯)，到時中共真係要白手套嘅話，會唔會真係扮俾香港獨立呢？ 發夢都冇咁早啦 :0) 攬炒都唔益你呀。所以話，最大可能就係封鎖中港兩地，等你斷水斷糧自生自滅。

anyway 各位老師晚安。