雲海開班教投訴冇人講🔇
雖然我唔知點解俾人擺上台（連登）咁不如我就不定期喺網上分享下投訴經歷啦！不過講真我唔係專家，我只不過係一個比較麻煩嘅人暏！
第一課：「對付違例泊車」
其實記住任何人行過馬路見到違例泊車都係可以致電999報案叫警察落嚟處理！當中包括喺馬路上停泊、雙黃線停泊、禁區位置停泊、甚至在進入停車場前排隊佔用馬路都可以投訴（呢樣我經常對付K11停車場）！
首先你要好清晰問清楚接電話嗰個人嘅姓名，之後你好清楚話俾佢聽邊一個位置有違例泊車，用好堅定嘅語氣同佢講請即刻派警察去趕車抄牌！之後記住記住攞低報案編號！之後報案中心會問得你留唔留低電話，你可以留可以唔留，但就算你撳咗133，呢套政府系統係一樣睇到你嘅電話號碼㗎！所以通常我會同佢講：「你個系統唔係已經有我電話號碼嘅咩？！」
收線後通常我都會喺現場等到有警察出現為止！若果超過15分鐘我唔見人，我會再次打返999，之後同職員講番我係幾點鐘報過警報案編號係幾多，之後你就咁講：「我報完警15分鐘都唔見有任何你嘅同事到場喎！政府服務的承諾係話7分鐘來到場個喎！你睇吓部電腦佢冇報到到咗！有報係虛假文書喎！」咁你就話堅持開多一個新報案編號，咁999個同事就會好驚，因為佢哋唔想有咁多個編號用係同一件事，我會好肯定嘅語氣咁講「即刻派同事去！」
若果情況冇改善到！你就可以用同一個方式再報多次警之後你就搵in charge聽電話！講晒成件事你話我而家重新再報多次警，攞一個新嘅報案編號！直到事件解決！（記住個前線同事會話佢都處理到唔使搵in charge，咁你就強調俾咗好多次機會佢搞唔掂所以堅持要搵in charge)
當然越名貴嘅私家車就應該越係對付啦！講真中環個個趕住返工無人有心機做咁咪仲壞左啲有錢佬囉！
今日炸兩俠教住咁多先！個個都係雲海，咁我哋交稅都交得甘心D！
1823
第二課：「如何投訴車輛違規行為」（比較長慢慢睇）
炸兩教室第二堂，我就利用一個實際例子講解一下下：話說星期一凌晨1:30（星期日深夜），如果大家有睇到電視台直播關於警方旺角清場結束之後，影住一架又一架警察用車，竟然可以喺路面紅燈行人綠燈嘅時候U turn斑馬線去第二條行車線！大家都見到有個睇唔過眼嘅市民想阻擋警車進行疑似違法行為！
當時我就馬上對着直播電視拍低左呢個畫面！咁第二日朝頭早9:00我就已經打電話去「交通投訴組」熱線：28899999，將整個情況告知投訴主任，在完成投訴報告後，我當然記得要攞返個File Number＃2019/07/0608！並且我講得好清好楚，要備注整個投訴首先要交俾運輸署投訴組、再交俾警方處理交通違規部門、以及警方公共關係科，三個部門都要回覆我！
好啦！首先講一講呢個投訴電話先，話說呢條熱線其實係隸屬於交通諮詢委員會，唔屬於香港任何一個政府部門，不得不承認其實都係廢廢地，佢哋最大嘅功能就係將你個投訴個案轉交比其他相關部門，只係一個中介人角色，其實我經常挑戰佢哋，咁你同1823有咩分別？一個長期存在左嘅委員會熱線，依家係一個雞肋！冇計！多個熱線轉介多一個號碼都好嘅！不過我喺呢一次嘅投訴裏邊同左佢哋嘅上級黃小姐問得好清楚，其實投訴警方汽車違例最終會交比邊個呢？黃小姐都好老實同我講其實都係會交返畀警方中央交通檢控組！咁我又問佢咁過去30年包括埋殖民時期，你所知嘅數據有冇任何一宗警方違例交通比警方中央交通檢控組檢控過啊？佢又好老實咁話俾我聽係零！都幾慘㗎！血一般的事實！
咁好啦，我又唯有再打運輸署投訴熱線：28042600，點知都係飛咗去1823！咁我就直接搵1823個阿頭去問清楚啦，咁佢都承認過嚟打運輸署個投訴熱線係關於交通違例事項，全部都會飛去1823，除非你係投訴公營運輸工具出現脫班班次問題等等，運輸署個熱線係有專門同事負責，係兩組唔同嘅人，而1823記錄個案之後都係會交返畀警方處理！咁投訴到嘅機會都係好渺茫嘅！不過呢單野我忍唔住都係要做架兩啦！
官方回復：好坦白講，我呢次投訴嘅官方回覆係比一般快好多好多，唔知係咪同Henry Chen投訴有關，首先運輸署用email官方回覆我收到投訴，一日後下晝就已經收到東九龍交通部洪sir嘅親自回覆問清楚個情況同埋叫我send段片俾佢睇，佢睇完段片真係5分鐘內再覆返我！咁呢段回覆時間我就真係冇辦法挑戰佢哋，合情合理，不過如我所料我投訴唔到，首先洪sir原本挑戰我問其實影片裏面唔單只係警車U turn喎之前仲有個黑色車你唔投訴？咁我即刻話咁我投訴埋啦！點知佢呆一呆，就即刻話咁可能架黑色房車裏便都係警務人員咁就可能執行緊任務㗎啦！阿Sir縮我都冇辦法！之後佢繼續講若果係拍攝電視畫面不能作出投訴，只能是現場見到情況及拍攝到畫面嘅人士才可以作出投訴，咁真係冇計啦！咁我就問清楚佢，警車有冇違例交通嘅豁免㗎？咁洪sir就清清楚楚同我解釋若果警車係執行緊任務期間違反交通規則係唔會被控告，但冇執行任務期間係違反交通規例！咁我話呢個場面清完場回頭呢？佢話都算係執行任務中，就算我現場拍低都告唔到！我話咁都得？佢話幫唔到我啦！咁我就問咁即係兩條投訴熱線都處理唔到懷疑警車違規問題啦！洪sir就話不如你打去公共關係科啦！我就話呢個投訴已經send咗去比公共關係科架喇不過佢哋冇回我咋！（至今第四日都唔回）
雖然呢次投訴事件唔成功，但各位可以注意，若果我哋係投訴一般車輛違規事件，在場目擊拍攝到相片影片係可以透過交通投訴熱線：28899999及運輸署投訴熱線2804-2600作出投訴，投訴脫班等等問題都可以打後者！記住攞投訴編號，講明點樣回覆包括電郵及電話等等。上完堂要實戰㗎！出街留意吓社會交通現象，自己香港自己救！
留名學嘢。
投訴之神開班唔學唔得