[載譽歸來] 大東京鐵路新手簡易攻略
由郊登大金主劉病已提供
會加少少新內容/修改過時內容
所以更新會要啲時間
新版序言
「其實年中咁多人去東京,唔通個個去之前都要睇你篇文長篇大論,先識得搵車搭咩?」
梗係唔係啦。上乗換案内(;亦有app版),入出發地,目的地,時間,一搵就知點搭。有曬唔同價錢/時間嘅組合畀你參考,自己揀個跟住坐車就得。
不過都有啲睇乗換案内唔會直接睇到嘅嘢,例如入閘/出閘有咩要注意,點理解発車案内板上面嘅資訊,等等。當然,唔知又死唔去嘅,東京啲車咁密。但如果對日本呢個天下第一嘅鐵路系統點運作有些少興趣嘅話——去到人地地方旅遊,唔會完全唔想知當地點運作啩?——咁本文會幫到你。
另外,本人之前鍾愛嘅鐵路時間表網えきから現已結業,勉強搵到嘅替代品係駅探(),但用起上嚟都係冇咁順手。
劉病 已提供
引子 何處是東京?
嚴格嚟講,日本冇一個「東京市」。「東京都」倒是有一個。咩係「東京都」?話說日本嘅一級行政區係「都/道/府/県」,「都」只有一個,就係「東京都」。
(BTW,「道」=北海道,「府」=大阪府、京都府,其他全部都係県,最出名嘅應該係……福島県?)
(再BTW,日本有二十個「政令指定都市」,即是特別大嘅城市,以人口計。其中唔包括東京,因為東京係特別嘅。而除此之外嘅城市,一係就係大城市嘅周邊延伸,一係就係鄉下。嗱,我冇講過政令指定都市就唔可以係鄉下啊。)
東京都其實好大,大家睇下google map就會見到,大到連喺太平洋中間嘅小笠原諸島都屬於東京都。
而大家一般最常講嘅「東京」,其實係東京都(唔計啲島)東部、臨近東京湾嘅廿三個「区」,又統稱為「東京都区部」。
(俾綠色線包住嗰啲就係「区」。)
一啲廣為人知嘅東京地標,例如東京タワー(東京鐵塔)、浅草雷門,或者靖国神社,同埋天皇住嘅皇居,都係喺23区入面。
但因為東京實在係太大嘅城市(「city of cities」),以致佢周圍嘅其他城市都十分繁華,所以東京嘅鐵路網,好自然就延伸到周邊嘅地區。因此本文標題為「大東京」,包含東京23区及周邊嘅地區:大約西至八王子市、東至千葉市、北至さいたま市、南至横浜市。
而講到東京嘅鐵路,冇可能唔講嘅,當然就係山手線。
一 圓圈加十字
喺google map開東京嚟睇,就會見到中間(千代田区中心)有塊畀條河圍住綠地——天皇(同佳子公主)所居住嘅皇居。當然冇任何鐵路可以穿過皇居,因此最自然嘅鐵路路線,當然係圍住皇居兜一個圈啦。
呢條綠色嘅就係JR嘅山手線(先唔好理其他顏色嘅線)。老老實實,唔係就咁圍住皇居圍一個圈仔,而係圍咗一個幾大個圈。(實際上,皇居位於東京站嘅西側,但距離東京站「對面」嘅新宿站相當遠。)理所當然,有順時針同逆時針兩個方向嘅列車。
(註:當年嘅日本国有鉄道,私有化之後變咗叫JR。JR分咗做唔同嘅區域,例如北海道、九州;而東京嘅JR幾乎全部都係屬於JR東日本。)
山手線接近經過曬東京嘅重要區域(定係因為有山手線經過,所以先會成為重要區域),最需要知道嘅站有六個:
東面嘅東京站:大部份新幹線都以此為總站,可以話係全日本嘅中央車站(所以叫東京站);站本身位於丸の内,大約類似係中環,名店林立,同埋成堆寫字樓
東南嘅品川站:東京嘅另一個新幹線站,但本身冇咩睇,真係純轉車feel
西南嘅渋谷站:(以前)有好多搽到成身黑曬嘅女,好似係主要係潮潮地嘅人shopping嘅地方
西面嘅新宿站:全日本最繁華嘅地方,東京都政府所在;新宿站亦係全日本結構最複雜嘅站,好易蕩失路
西北嘅池袋站:其實都係shopping嘅地方,我會覺得比較好行,冇新宿咁雜亂
東北嘅上野站:有幾間博物館,同埋櫻花季節充滿強國人嘅上野恩賜公園就喺隔離;東京嘅再另一個新幹線站(係呢三個喇)
除咗因為呢幾個地方去日本冇可能唔去(唔計品川啦),同埋好多其他鐵路路線要喺呢幾個站轉車之外,認得呢幾個站嘅位置,係因為要知道搭去邊個方向嘅車。喺月台指示牌上面,順時針係「外回り」,逆時針係「内回り」(幅圖都有寫,喺中間偏上嘅位置)——因為好難睇得明,所以指示牌上面會寫埋去邊個站。
例如而家你喺東京,順時針嘅列車,指示牌上面就會寫「品川.渋谷方面」;逆時針就係「上野.池袋方面」。而站牌永遠都係用呢六個站做指示,唔會出現咩「秋葉原方面」。
當然,如果你想去上野嘅話,搭順時針嘅車都唔係唔得嘅,只不過會兜咗大半個圈囉。同埋有時山手線會用南面嘅大崎站做總站,你要去月台對面上另一班車繼續兜埋淨番嘅圈。
(而其實佢喺上月台嘅樓梯下面/月台上面會有指示,話畀你知去另一個站搭邊一個方向嘅車快啲。)
講開秋葉原,秋葉原站喺上野同東京中間,算係交通樞紐,同埋去東京必去之地,我話嘅。
最後,山手線嘅車好密(一般三、四分鐘一班),而且每個站都停,所以唔驚企喺月台有排等/上錯特急(會飛站嗰啲,後面會更詳細講),當香港地鐵咁搭就得。同埋冇女性專用車廂。
講吓大江戶線
要補充一下,日文叫站做「駅」,不過方便起見呢度全文都會用番「站」,但就會用番日本站名。
山手線係圓圈,跟住重有個十字。十字者,一橫一直,先講橫。
上圖黃色嗰條,由東至西嘅,就係「中央・総武緩行線」(先唔好理點解中間有一點;記住,係「中央・総武」,缺一不可,因為有另外嘅「中央線」,同埋「総武線」)。本文後面會簡稱為「中央総武線」。仔細睇你會見到有條青色嘅山手線;其他線可以唔使理佢住。
如果要由東京東面去西面,搭山手線兜大圈未免太嘥時間。所以有條打橫穿越東京嘅中央総武線,而且同山手線一樣,班次密而且站站停。
不過有樣嘢衰嘅係,唔係架架中央総武線都係由西面嘅三鷹站出發,然後以千葉站為終點。好多時候,列車會喺中野站開出,然後以津田沼站為終點。反之亦然。
中央總武線同山手線當然有轉車站——而且有三個:東面嘅秋葉原站,同西面嘅新宿站、代々木站。咦,點解有三個站?因為中央總武線喺代々木站同山手線相遇之後,會同山手線平行咁去到新宿站,再繼續西進。(參見上面山手線幅圖嘅黃色線走法。)
除咗新宿同秋葉原之外,呢條線上面最多遊客會去嘅站應該係吉祥寺(隔離有吉卜力博物館)、中野(二手動漫嘢,同埋係平價shopping地區)、同埋両国(相撲館)呢三集站啩,我諗。
BTW,呢條線只有西萩窪站同小岩站之間屬於東京23区,往東面嘅係千葉縣,西面嘅吉祥寺站同三鷹站分屬東京都(但唔係23区之一)嘅武蔵野市同三鷹市。但一般嚟講,不用分那麼細啦。
我呢啲窮撚只係搭得起メトロ
喺中央総武線,我哋可以見到一樣日本先有嘅嘢——女性専用車。
但其實呢樣嘢同想像中有啲分別,因為女性專用車通常唔係全日都有嘅嘢,通常係早上繁忙時間嘅某個方向先會有嘅嘢。例如中央総武線,就係朝早(0720-0920)嘅錦糸町站往三鷹站嘅列車先會有女性専用車。而且通常只有一節車廂係女性專用,並有標識標明。有時喺月台上面(地下)已經標明咗。
上圖:月台標示;下圖:車廂外嘅標示
當然,你喺其他時間搭車,一樣可能會喺門口見到「女性專用車」嘅牌。(因為佢唔會咁得閑去到女性專用時段黐上去,完咗再摵落嚟。)但只要唔係喺佢列明嘅時間/範圍內,就唔使理佢,照入可也。
如果懶得睇/睇唔明嘅,望下入面有冇男人就得。不過講明先,細路/傷殘人士嘅話,男人都可以入女性專用車。
最後重有一直,就係京浜東北線。京即係東京,浜即係横浜,東北指埼玉県一帶。
粉藍色嗰條就係。你可以搵下山手線同中央總武線喺邊。睇真啲,你會發現由田端站一路去到品川站,呢十四個站同山手線完全重疊。
撇除山手線上面嘅站,呢條線值得講嘅站只有北面嘅大宮站(埼玉県嘅中心站)同南面嘅横浜站(神奈川県嘅中心站)。
但老老實實,呢條線對我嘅最大作用係如果佢嚟得早過山手線就上呢架。因為喺呢十四個站(除咗品川之外),去同一個方向嘅山手線/京浜東北線會喺同一個月台嘅兩面,即係咁樣:
例如你喺東京站想去上野嘅話,可以喺月台上面睇下逆時針嘅山手線,定係北行嘅京浜東北線嚟先,邊架嚟先就上邊架。
最後,喺中午前後(大約十點幾至三點幾),京浜東北線喺同山手線重疊嘅一段係會飛站嘅。呢個時候你會見到月台啲牌/車廂上面喺「京浜東北線」旁邊會寫住「快速」,即係咁:
而上到車望一望路線牌:
例如上圖可見,係會飛咗新橋、有楽町、鶯谷、日暮里、西日暮里呢幾個站(所以灰色咗);御徒町喺閑日都會唔停。如果你要去呢幾個站嘅就請轉山手線(除咗品川之外,都係過月台另一面就得)。例如你喺大森站上咗車,想去日暮里站,但發現唔停,咁就可以去到上野站,落車,去月台對面上山手線,再搭到去日暮里站。
中央総武線(只限中野到津田沼一段)同埋京浜東北線嘅班次同樣相當之密,日間五分鐘之內有一班。
講咗三條班次最密、亦係最易搭嘅JR路線之後,跟住我會講亂到九彩嘅地鐵。
學到好多嘢
正皮
試下係咁讚我
下星期去日本,額額你
下星期去日本,額額你
去旅行其實求其down個鐵路app已經夠用
好
下星期去日本,額額你
去旅行其實求其down個鐵路app已經夠用
如果佢係超新手未必識搵幾番線邊方面上車
下星期去日本,額額你
去旅行其實求其down個鐵路app已經夠用
如果佢係超新手未必識搵幾番線邊方面上車
都去過嘅,不過知多啲都好
去旅行其實求其down個鐵路app已經夠用
如果佢係超新手未必識搵幾番線邊方面上車
都去過嘅,不過知多啲都好
今次主要會加啲app睇唔到嘅嘢,例如上面嗰段講女性專用車嘅
如果佢係超新手未必識搵幾番線邊方面上車
都去過嘅,不過知多啲都好
今次主要會加啲app睇唔到嘅嘢,例如上面嗰段講女性專用車嘅
我想知痴漢列車
二 一個東京,兩個地鐵
JR由於係全國規模嘅鐵路公司,喺服務地區方面自然力有不逮(雖然已經有上面呢三條班次又密,站距又短嘅路線)。而事實上,喺東京,密密麻麻地同時存在住好多其他鐵路公司(非JR又非政府營運嘅鐵路公司會叫做「私鉄」,而其中大型/歷史悠久嘅又會叫做「大手私鉄」)。其中唔少私鉄主打係將乘客由東京運送到近郊(有少數會一路去到相當之遠嘅地方),而同上面三條線一樣,肩負東京內部運輸重任嘅,就係地鐵。
正如香港以往有MTR同KCR,東京都有兩個地鐵系統——東京メトロ(東京Metro)同都営地下鉄(都営),兩個系統之間互不從屬,轉車要計兩次錢(雖然有啲轉乘優惠)。
左面係メトロ,右面係都営,嘅logo。メトロ係私營嘅,而都営地下鐵則係由東京都政府營運,好似負緊唔少債。
首先睇下啱比例嘅路線圖,等大家對路線有基本嘅印象。呢個係只有メトロ嘅版本:
可以見到,喺幅圖中間有個空位(半蔵門站同二重橋前站之間),呢個就係皇居。周圍俾唔同嘅線路重重包圍。然後呢啲線又向東南西北唔同方向延伸。
即是話,搭メトロ嘅話,如果要轉線,通常都搭到去皇居周圍,然後先有得轉車。
惟一例外係西面深啡色嗰條副都心線,亦係東京地下鐵最新起嗰條線,完全唔經皇居一帶。
再睇下都營地下鐵:
明顯簡單好多,主要係一個紫紅色嘅圈。
而如果你要睇點轉車嘅話,呢個版本可能會易睇啲:
(喺呢幅圖上面,黑白相間嘅係山手線。有顏色嘅粗線就係兩間公司嘅地鐵線。其他就係其他線啦。)
惟一例外係西面深啡色嗰條副都心線,亦係メトロ最新起嗰條線,完全唔經皇居一帶。
再睇下都営地下鐵:
明顯簡單好多,主要係一個紫紅色嘅圈。
而如果你要睇點轉車嘅話,呢個版本可能會易睇啲:
(喺呢幅圖上面,黑白相間嘅係山手線。有顏色嘅粗線就係兩間公司嘅地鐵線。其他就係其他線啦。)
上面幅圖有啲站冇名嘅換咗佢先
呢度岔開少少話題。既然有唔同嘅鐵路公司營運唔同嘅鐵路,咁佢哋啲轉乘站又係唔係起埋一齊嘅呢?
有時係,有時唔係。
有啲時候,唔同鐵路公司會分享一個站,甚至分享埋個月台。例如中野站同時有JR同メトロ,你無論係想搭邊一樣,都係入同一個閘就得。即是有如你喺九龍塘站,無論想搭東鐵線定觀塘線,都可以用同一個閘機入閘。
(個站上面大大隻字寫住JR,然後要好小心先可以喺下面見到メトロ嘅logo。)
但多數時候,唔同公司嘅站係連埋一齊,但係轉車要出閘再入閘先得。呢樣嘢當然好正常啦。
(新宿三丁目站嘅都営同メトロ嘅付費區就係分開嘅,轉車要出閘再入閘。)
一啲設計得衰啲嘅,就要離開個站,行一段路,再入另一間公司嘅站。即是如果落雨天轉車,係要擔遮嘅。
(JR同メトロ各自都有有楽町站,但轉車要經過一小段露天空間先得。)
更加奇怪嘅,就係明明係同一間鐵路公司嘅站,但卻又要離開個站,行一段路面,再入番去。
(冇錯,就係講緊都営嘅蔵前站,起到咁唔知係唔係同冇錢有關。)
而有啲好啲嘅,就要出閘再入閘但起碼唔使上地面。
(三越前駅嘅兩條線付費區並不相連。可以想像為尖沙咀同尖東站?)
喺呢啲站轉車,出閘時搵下有冇橙色閘機。嗰度通常會寫明可以經呢部機轉咩線。
(好似上面咁,想轉有楽町線就用呢部機啦。)
(有時啲站明明唔同線係連住嘅,但為咗分流都可能會畀你出閘再入閘但計錢時唔當你出過閘。呢啲場合可以考慮下利用佢嚟買下嘢——メトロ嘅限時係30分鐘。)
以上講緊嘅都係同一個名嘅站,而有時有啲唔同名嘅站,又會連埋一齊。
(国会議事堂前站同溜池山王站同屬メトロ,而且轉車亦唔使出閘,但就叫唔同嘅名。……即是中環站同香港站咁。)
上面漏咗講嘅係,如果你用IC卡(即是八達通咁嘅嘢),就唔需要理咩橙色閘機。而佢冇畀你出閘再入閘嘅話,你無啦啦出閘再入閘就要計錢。參見
不過最陰人嘅都莫過於一啲同鐵路公司,同路線,但唔同方向要喺唔同地方入閘,甚至唔同入口進入車站,嘅嗰啲站。呢啲站係一啲比較舊式嘅設計,喺全日本第一條地鐵,銀座線(メトロ嘅,橙色),就可以見到。呢條線係由渋谷站去到浅草站。
咁即是話你知,去渋谷方面就喺呢度落,如果想去浅草方面就去另一個出入口啦。
另外メトロ同都営幫自己啲站改曬編號,例如上面嘅G14就係G線(銀座線)嘅第十四個站。(其實JR都有,但比較低調。)
講番條線本身。基本上去東京嘅遊客好難唔去浅草(G19)睇下雷門、拜下浅草寺之類,而呢條銀座線就正正係東京地下鐵入面惟一一條去浅草嘅
跟住過幾個站就係之前叫大家專登認住嘅JR大站上野(G16)
末広町站(G14)其實幾近秋葉原,或者話其實一出站就會見到啲毒嘢,唔似メトロ嘅秋葉原站一出站只會黑人問號
三越前站(G12)顧名思義喺間三越百貨前面——其實呢個係東京惟一一個用百貨公司嚟命名嘅站名,就好似銅鑼灣叫「崇光前」咁 不過其實東京重有好多三越同其他百貨(純粹想講下,個站本身冇乜好去)
銀座站(G09)就係銀座啦,都係啲中環feel嘅繁華消費區
新橋站(G08)係去台場嘅門戶,同埋有得轉JR,亦係日本歷史上第一個鐵路站(不過而家重建曬喇,好難感受到歷史嘅氣息)
溜池山王站(G06)同赤坂見附站(G05)都係地下鐵嘅轉車大站,後述
表參道站(G02)就係張敬軒迷失嗰度喺正shopping勝地表參道下面——好多國際名牌,如果你係帶女去嘅話,九成九要去
渋谷站(G01)又係shopping嘅地方(講過啦,亦係山手線嘅大站)。特別嘅係銀座線嘅月台係喺一座百貨公司嘅三樓;但係其他地鐵線就喺地下,轉車要出閘再入閘
跟住係紅色嘅丸ノ内線,由池袋站去到萩窪站/方南町站——係,終點係有兩個,但正常遊客應該唔會用新宿以西嗰啲站,所以唔需要理會究竟架車係去萩窪站定係去方南町站(可以當係東鐵線又去羅湖,又去落馬洲咁)
大家可以注意到架車係由東京西北面,專登向東兜過皇居,再兜番返去東京嘅西面,所以正常人都唔會坐佢由池袋去新宿,兜大圈好好玩咩
池袋站(M25)唔再重覆講
御茶ノ水站(M20)雖然睇落去可以轉JR(中央総武線),但其實要出站,喺烈日/暴雨下行幾十米,先轉到JR
大手町站(M18)又係一個地鐵轉車大站,後述
東京站(M17)一睇就知喺JR大站東京站隔離,而呢個站嘅惟一一條地鐵線就係丸ノ内線;但其實其他站都同JR東京站好近,後述
銀座站(M16)
国会議事堂前站(M14)、赤坂見附站(M13)轉車大站,下述
四ツ谷站(M12)又可以轉JR(中央総武線),今次唔使上地面
新宿御苑站(M10)、新宿三丁目站(M09)、新宿站(M08)三個都係喺新宿入面(因為新宿好大)嘅站同埋其實距離唔算遠——特別係中間只有300米嘅新宿三丁目站同新宿站。同埋其實如果你想去新宿御苑嘅話,新宿三丁目站會近啲
例如咁就會有咩難處呢?
喺介紹下一條線之前,我希望總結一下東京地下鐵嘅中心五大轉車站:
大手町站
呢個站嘅月台其實係一個四方形嘅陣
(自行忽略左上角嗰幾棟嘢啦。)
之所以畀幅圖大家睇,係想大家明白,因為啲地鐵站嘅月台佈陣問題,同埋啲站比較近,所以其實一個「站」可以覆蓋好大嘅範圍
雖然特別有一個「東京站」(右下方紅色嗰個),但其實大手町站嘅東西線就喺JR東京站隔離(重有地下通道相連);但如果你喺千代田線月台行過去就要行幾耐下
所以有時唔使執著一定要去嗰個站——例如去秋葉原唔一定要喺秋葉原站落車,末広町站都得
睇google map會幫到你知道附近其實有咩站
銀座站
霞ケ関站
站一個,由於中央政府機關林立,所以霞が関呢個地名又會用嚟代表「日本中央官界」
国会議事堂前站.溜池山王站
前面都介紹過,呢兩個站其實係同一個站(兩個站之間轉線甚至唔使出閘)
赤坂見附站.永田町站
又其實係唔使出閘嘅同一個站
(你睇下丸ノ内線嘅路線圖,就會發現上述啲站其實係黐埋一齊[按順序係大手町→東京→銀座→霞ケ関→国会議事堂前→赤坂見附];所以東京地鐵畀人話睇點轉車睇到眼花都係正常)
基本上除咗比較特別嘅副都心線同正常唔多會搭嘅南北線之外,基本上任何兩條メトロ線嘅轉車都可以用呢五個站搞掂
而其實霞ケ関站有大量政府機關,同国会議事堂前站.溜池山王站上面直頭係國會
唔知點解會將啲大型轉車站設喺呢度……
呢part最後講埋灰色嘅日比谷線
其實呢條線嘅形狀同銀座線差唔多 但係就隔開咗少少,覆蓋一啲其他地鐵線冇嘅地區
中目黒站(H01)一個文青feel嘅地方(冇去過)
恵比寿站(H02)好似又係shopping嘅地方,亦係JR山手線嘅站
六本木站(H03)メトロ得日比谷線去呢個站;又一高檔消費區。不過重有兩個博物館,其中森美術館位處高樓,可以睇到東京全景(個人推介)
神谷町站(H05)メトロ最近東京タワー(東京鐵塔)嘅站
霞ケ関站(H06)轉車大站
銀座站(H08) 轉車大站(三條經過銀座站嘅路線都出曬場)
秋葉原站(H15)都係得日比谷線去呢個站;想去買毒嘢嘅話要穿過JR站,同埋其實末広町站會就腳啲
上野站(H17)轉JR啊
北千住站(H21)其實只係一個近郊大型轉車站,不過呢個站嘅設計相當有趣,唔同公司可以共享付費區,但同一公司嘅轉乘又可以要出閘再入閘
即是,如果想坐メトロ去六本木或者睇鐵塔(本人並非推薦緊呢個景點),就一定要坐日比谷線
而北千住站亦話畀大家知,入閘前真係要睇清楚你入緊邊間公司嘅邊條線嘅邊個方向嘅付費區。(當然入錯咗,其實都可以搵職員求救嘅,相信佢哋都慣咗會有入錯閘嘅外國人。)
而日比谷線比起之前嗰兩條線,有一個特點:就係會同其他鐵路公司嘅路線「直通運轉」。嚟緊我會介紹下咩係「直通運轉」,之後再講淨番嘅地鐵路線
通行運転世界第一
通行運転世界第一
直通*
點樣195円搭曬大半東京?
點樣195円搭曬大半東京?
唔出閘咪得
點樣195円搭曬大半東京?
唔出閘咪得
當然都有時間限制,唔好太離譜啦
有無列表建議盡量避免唔好喺邊啲車站轉車?
尤其是要上地面行一段路去另一個入口轉線嗰啲
有無列表建議盡量避免唔好喺邊啲車站轉車?
尤其是要上地面行一段路去另一個入口轉線嗰啲
有啲係連住但要行餐死
有啲就要上地面不過又唔係行好耐
各適其適
我又真係冇個列表喎
同埋愈麻煩嘅轉車我愈想試下
如果用JR上面講嗰三條線嘅站嚟睇嘅話
山手線嘅有楽町、駒込、御茶ノ水、水道橋、両国、錦糸町,轉地鐵嘅話雨天都會拎番把遮,特別係両国
御茶ノ水同水道橋都要過橋其他就淋一淋雨
另外地鐵自己互轉嘅話,就有大名鼎鼎嘅蔵前
轉私鉄嘅話,就都営同東武嘅浅草站轉車
當然重有好多行餐死/轉餐死嘅站,但就暫且略過不表,跟指示行唔會出事嘅(除咗大佬級嘅新宿站)
重有啲嘅
豊洲站,地鐵轉ゆりかもめ
天王洲アイル站,ゆりかもめ轉りんかい線
五反田站,地鐵轉東急
西日暮里站,地鐵/JR轉日暮里・舎人ライナー
另外喺某啲轉車大站,會有一啲專門用嚟轉車嘅閘口。例如咁。
呢啲閘口會直接將你由一間公司嘅付費區帶到去另一間公司嘅付費區。上面通常會大大隻字寫住係轉車(のりかえ)用嘅閘口……用日文。但睇真啲都係會有英文甚至中文嘅,因為遊客愈嚟愈多。
Bookmark 先
下星期去日本,額額你
去旅行其實求其down個鐵路app已經夠用
Yahoo個app得日文
下星期去日本,額額你
去旅行其實求其down個鐵路app已經夠用
Yahoo個app得日文
唔用日文點睇住方向搭車?
乏人問津
乏人問津
等你繼續講
乏人問津
等你繼續講
我一上面問你啲嘢都未答……
去旅行其實求其down個鐵路app已經夠用
Yahoo個app得日文
唔用日文點睇住方向搭車?
有寫英文..🙄